सिन्धुली, असार ९ ।
समाजसेवामा समर्पित मानव कल्याण समाज सिन्धुलीले पहिलोपटक सडकमा आश्रित दुई जना बालबालिकालाई उद्धार गरी सुरक्षित जीवन, शिक्षा र पालनपोषणको सुनिश्चितता प्रदान गरेको छ । सामाजिक उत्तरदायित्व अन्तर्गत गरिएको यस कार्यले संस्थाको मानवीय सेवाप्रतिको प्रतिबद्धता प्रस्ट पारेको छ ।
सिन्धुली बसपार्क क्षेत्रमा सुतिरहेको अवस्थामा भेटिएका ती दुई बालबालिकालाई आज जिल्ला प्रहरी कार्यालय सिन्धुलीको सक्रिय सहयोग र समाजका कार्यसमिति सदस्य गणेश बस्नेतको अगुवाइमा उद्धार गरी श्री ऋतम्भरा ज्ञान स्वरूप विद्यालयमा औपचारिक रूपमा हस्तान्तरण गरिएको हो ।
विद्यालयका प्रधानाध्यापक विनोद थापाको सहकार्यमा ती बालबालिकालाई निःशुल्क आवास, भोजन तथा औपचारिक शिक्षासहित संरक्षणको व्यवस्था गरिएको छ । अब ती बालबालिकाले सडकको कठोर जीवन बिर्सेर विद्यालयको स्नेहपूर्ण वातावरणमा शिक्षा र जीवन सीप हासिल गर्न पाउने छन् ।
संस्थाले यस कार्यलाई “मानवीय उत्तरदायित्वतर्फको ऐतिहासिक पाइला” भनेको छ । उद्धार कार्यमा साथ दिएका जिल्ला प्रहरी कार्यालय, विद्यालय परिवार र अन्य सहयोगी निकायप्रति संस्थाले विशेष आभार व्यक्त गरेको छ ।
बाल अधिकार र मानवता सम्बन्धी उदाहरणीय कार्यको रूपमा हेरिएको यस पहलले समाजमा सेवा, सहानुभूति र उत्तरदायित्वबोधको गहिरो सन्देश दिएको छ । मानव कल्याण समाजले आगामी दिनहरूमा यस्ता थप बालबालिकाको उद्धार र संरक्षणका लागि अझ सशक्त पहल गरिने स्पष्ट पारेको छ ।
संस्थाले बच्चाहरूको व्यक्तिगत गोपनीयता सुनिश्चित गर्न तस्बिर वा अन्य व्यक्तिगत विवरण सार्वजनिक नगर्ने निर्णय गरेको जानकारीसमेत दिएको छ ।
यस सामाजिक कदमले निष्कलंक बाल्यकाललाई पुनःस्थापित गर्ने दिशामा एउटा प्रेरणादायी सुरुवातको संकेत गरेको छ, जसले सम्पूर्ण सिन्धुलीमा समाजिक उत्तरदायित्वको नयाँ परिभाषा कोरेको छ ।
